اقبل هلال الصوم جيتك اهنيك

اقبل هلال الصـوم جيتـك اهنيـك
وقت السحر ماودي الناس تـدري

لا تطري الفرقى عسى الله يخليـك
فرقى الحبايب منكوي منه صـدري

قلبي وعيني والمعاليـق ترجيـك
رد النّظر لا ترخص اليـوم قـدري

هذي يديني ترتجف بيـن اياديـك
اعطف عليّ لا توقد النـار بـدري

انا وقلبي يالغضي فـي حراويـك
سلمت لك روحي وسلمـت أمـري

داعي الهوى يا مهجة الروح يدعيك
لبي ادعاته قبـل مالليـل يسـري

مالك اموازي قَـلْ منهـو يوازيـك
ياوحة ينبـت بهـا كـل عطـري

ردي لي الفرحـه تعالـي اناجيـك
مقدر اكابر فاض بي اليوم صبـري

انت كنت تغليني فانا والله اغليـك
يدفاك قلب(ن) جره الشوق جـري

منهـو يسلينـي ومنهـو يسليـك
ومن يحفظ الاسرار يا سر عمـري

هذا قصيدي مولفه جيـت أوريـك
بخط سطر وتبعـه الـف سطـري

كل الحروف ان صغتها ما تكفيـك
لوبه حروف(ن) تنشرى كان اشري